3Jo | KHZ | STEP |

IOANE GENA TALOTALO VEGA-TOITOINA

3 Ioane vega-matagaina kilara

Ioane na epepa vega-toitoina ekalesia matiligana ta arana Gaius gena etaloato.

Epepa rigolo 85 e 100 vekarawarai Ioane na etaloato, Iesu ekwaregato mulinai.

Golea kamuna golea 5.

Ioane na epepa etaloato gena ririwa,

1) Gaius pene vega-nagia, vowalakava reketa egapi-ragerato pakurai;2) Gaius pene vega-ripaa, vokaroverave talimana arana Dioterefe Ioane matotauna pene ago pene vepaku-koekoea netiwato;3) Demetrio gena kala namara pene gitara netiwato.Ioane na epepa eveitaina enavugaato:1. Gaius evega-nagiato - golea 1-82. Dioterefe ekilagi-rakavaato - golea 9-113. Demetrio evega-rageato - golea 12-14

3 John

1 Au, ekalesia kuneagina tauku, na gataku namana Gaius atalo-venimuna. Goi aulamagimuna maaoku maparana na.

2 Gataku namamu, Palagu anogiana gau maparara okalarana nama pia vega-walara ulanana, e goi maki ragai vagi pene kala-nakulanakulamu, kwalana au ripaku goi palagumu nama, pe nama e verere aimo pono talu. 3 Walakava reketa gevogomaito, ne goi kila taunatauna raka okwalana-tiwaato e gemu veraramani gema varakuto. Voira akamonagirato aonai, au averere-rakavato. 4 Akamonagina, au natuku kila taunatauna gekwalanarana gaura, geku veagi e verere gekamu-rakavana. Gau reketa vererera okalana maki evangirana.

Gaius gena inagulu gevega-rageato

5 Gataku namamu, goi magemu veraramani einagulu okalaana aonai, kwalana walakava reketa geria lakalakai ogapi-ragerana, lewana ati ripamu talimara. 6 Ira na ekalesia wailarai goi gemu ulamagi gema kilagi-matagairato. Gemu kala mapono veakavara, pe geria lakalaka pia ago-venia Palagu gena ririwa rauparana gelegelenai. 7 Kwalana Keriso arana pakunai gelaka-piatito, e geria lakalakai ati ekalesia talimara geriana gau kwauta ati gegapi-rageato. 8 Ita na vovetaina talimara pita veakavara, kwalana vovetaina voo kila taunatauna valipiana pakunai pita inagulu-koukou.

Dioterefe gena kala rakava

9 Pepa kupana ta ekalesia goleana atalo-veniato, na Dioterefe pene vekuneagi netiwato talimana au rakagau akilagirana ati egapi-rageana. 10 Gaura pakurai au pana wati, ia na rakagau ekalarana kalara maparara pana wati kilagi-matagaira, kila rakavara ai gemai ekilagirana kilara e opakau kilara! Ati vokalamo, na walakava reketa gema wariwarina maki ati eririwana pene gapi-ragera. Vowariwari pene gapi-ragera netina ekalesiara maki evega-wairana e ekalesia na etao-piatirana.

Demetrio gena kala nama

11 Gataku namamu, rakava gekalana talimara ragai pono kala-tovotovora, na kala namaramo. Kala namara ekalana talimana Palagu gena talima, a kala rakavara ekalana talimana Palagu ati egitaato.

12 Taunilimalima maparara gekilana, Demetrio talima namana negetina; Palagu gena kila taunatauna na maki evega-matagaiana talima namana. Ai na maki ia vovetaina gakilagiana, e goi ripamu, ai gema kila taunatauna.

Kila ikara

13 Au aririwana kila vogo para talo-venimi, na ati aririwana pepai pana talora. 14 Au geku tugamagi pana wati, pe taura ruala patara talu-vewaila vou patara kilakila.

15 Maino gemu ai pene mia. Gatara eirana gevega-namamuna. Gatara kwapurakwapura nenai geku vevega-nama pono venira.